Parekoy, kauna-unahang komediserye By: ---   From: Pilipino Star Ngayon [January 04, 2009] May bago ng katatawanan mula sa pinakabagong barkada sa Kapamilya Network — ang Parekoy. Mapapanood simula bukas, January 5, pagkatapos ng Wowowee, binubuo ang kauna-unahang komediserye ng ABS-CBN nina Zanjoe Marudo (ang PApabol na si Mario), John Prats (REsponsableng Joseph) at Jayson Gainza (KOYabol Jess). Sundan ang mga nakababaliw na kalokohan ng Parekoy guys at alamin ang lihim na itinatago ng kanilang pagkatao. Mapanindigan kaya nila ang kanilang pagkakaibigan? Bukod sa mga nakakaaliw na mga pagdadaanan ng magkakabarkada, kapana-panabik ding sundan ang kanilang buhay pamilya. Ang macho at takot sa bading na si Mario, mabaliw kaya ’pag nalaman niya ang itinatago ng kanyang ama? Paano naman kaya haharapin ni Joseph ang pagiging mabuting kapatid sa kanyang mga kapatid na lahat ay babae? Makakalusot naman kaya si Jess sa kanyang pagiging under de saya sa kanyang misis? Sa direksyon nina Randy Santiago at Quark Henares, ang Parekoy ang magsisilbing bonding time ng mga mag-totropa at magkakapamilya tuwing hapon. Matutuklasan na pwedeng tumawa kahit may nakakaiyak na mga eksena. Abangan!